नव्याची नवलाई : पहिली बाईक राईड
कोथरुड - नेकलेस पॉईंट - भोर - सोमेश्वर मंदिर वासोळे - मांढरदेवी - किल्ले पांडवगड - वाई - लक्ष्मी नृसिंह मंदिर, धोम - सज्जनगड - पुणे
सज्जनगड येथे आयोजित वासंतिक संस्कार शिबिरासाठी सलग दोन रविवार सज्जनगड येथे जाणे झाले. छत्रपती शिवाजी महाराज आणि त्यांचे आद्य गुरु रामदास स्वामींच्या पदस्पर्शाने पावन झालेल्या भूमीत सात दिवस मुक्कामी राहून समर्थ शिकवण अनुभवायला मिळणे यासाठी पूर्वसंचित असले पाहिजे हेच खरे. मुलाला सज्जनगड येथे सोडायला जाताना परमार्थात स्वार्थ म्हणून आजूबाजूला अजून काही भटकायला आहे का बघत असताना मोरघळ सापडली. लागलीच तिथे चक्कर मारून आलो. मोरघळीकडे जाणाऱ्या वाटेत दोन्ही बाजुंनी जांभळाची झाडे खच लगडलेली होती. मनसोक्त रानमेवा चाखत छोटेखानी भटकंती झाली होती.
या रविवारी या संस्कार शिबिराचा समारोप असल्याने परत जाणे प्राप्त होतेच. मग यावेळी प्लॅन ठरला तो बाईक राईडचा. जाताना सरसकट हायवे ने न जाता जरा फोटोजेनिक स्पॉट्स घेऊ म्हणून भोर - मांढरदेवी - वाई - धोम असा परिसर निवडला. बाईकवर जायचे म्हणजे नेकलेस पॉंईंटला हजेरी लावून जाणे क्रमप्राप्तच. भोर ओलांडून मांढरदेवीचा घाट एकदा चढला कि निसर्गाला काय बहर येतो कुणास ठाऊक? येथून दिसणारा भोरकडील परिसर जेवढा विहंगम त्यापेक्षा जास्त धोम जलाशयाचे रुपडे अप्रतिम. कोळेश्वर, महाबळेश्वर असे आडदांड भाऊबंद निवांत पहुडलेले आणि त्यांच्या कवेत धोम धरणाच्या पाण्याने आपला निळाशार रंग मिसळून केलेले निसर्गचित्र निव्वळ अप्रतिम. आसमंताशी स्पर्धा करणारे कमळगड, पांडवगड वैराटगड असे खंदे शिलेदार आणि निळ्याशार आकाशात जमलेले कापसासारखे पांढरे शुभ्र धवल ढग. हे म्हणजे विध्यात्याने आपल्या कुंचल्यातून अव्वल चित्र रेखाटावे तसेच!
पांडवगडावरून दिसणारे विहंगम दृश्य. समोर धोम जलाशय आणि कमळगड
पांडवगड प्रवेशद्वार
सध्या लवकर पावसाची चाहूल लागल्याने सकाळपासूनच आकाशात ढगांची गर्दी व्हायला चालू झाली होती. वासोळे गावात पोहोचलो तर तेथेच मंदिराचे पुजारी काका भेटले. त्यांची अडचण असल्याने त्यांना महादेवाची पूजा करणे शक्य नव्हते. आज बहुतेक महादेवाची पूजा आमच्याच हस्ते होणे होते. पूजा करून फोटो काढून मांढरदेवी दर्शन करून पांडवगडाची वाट धरली. पांडवगड ऑन द वे असल्याने तो स्किप करणे शक्य नव्हतेच. तेवढेच जरा तासाभराची चढाई होईल म्ह्णून एकट्यानेच चढाई चालू केली. पांडवगडाच्या माथ्यावर आग्या माश्यांचे मोहोळ उठले आहे आणि नुकताच तीन दिवसांआधी काही लोकांना त्यांचा प्रसाद मिळून ते वाईमधील हॉस्पिटलमध्ये पाहुणचार घेत आहेत असे कळल्याने थोडी पाकपुक झाली. एकटाच असल्याने जाऊ कि नको विचार होताच, मग काय, मगाशी पूजा करून घेतलेल्या महादेवाच्या नावाने गडफेरी पूर्ण केली. उतरून वाई आणि मग धोम येथील लक्ष्मी नृसिंह मंदिर. हे सगळे आटोपून वाई मार्गे पाचवड -सातारा - सज्जनगड अशी सुंदरशी राईड संपन्न जाहली.
कोणत्याही टिप्पण्‍या नाहीत:
टिप्पणी पोस्ट करा